Piyodaga yoʻl bermagan yoki polosani bosish jarimasi ikki barobarga oshdi
O‘zbekistonda yo‘l belgilari va chiziqlari talablarini buzganlik uchun jarimalar ko‘paytirildi, jumladan svetofor oldidagi uzluksiz chiziqni bosib o‘tish va piyodalar o‘tish joylaridan o‘tish qoidalarini buzish uchun.
2025-yil 20-fevraldan boshlab O‘zbekistonda yo‘l chiziqlari, yo‘l belgilari talablarini va piyodalar o‘tish joylaridan o‘tish qoidalarini buzganlik uchun jarimalar kuchaytirildi.
Endi jarima BHMning 0,5 baravaridan 1 baravarigacha oshirilib, 375 000 so‘mni yoki 50% chegirma bilan to‘langanda 187 500 so‘mni tashkil etadi.
Birinchi huquqbuzarlik uchun jarimani kuchaytirish bilan bir qatorda, takroriy huquqbuzarlik uchun oshirilgan sanksiyalar Ma’muriy javobgarlik to‘g‘risidagi kodeksning 128-moddasidan chiqarib tashlandi. Endi bu modda quyidagicha:
128-modda. Haydovchilarning transport vositalarini piyodalar yo‘lkalaridan yurgizishi, yo‘l belgilari va yo‘l harakatining boshqa qoidalari talablariga rioya etmasligi
Haydovchilarning transport vositalarini piyodalar yo‘lkalaridan yurgizishi, yo‘l belgilari yoki yo‘lning qatnov qismidagi chiziqlar bilan belgilab qo‘yilgan talablarga rioya etmasligi, yuk avtomobillarida yo‘lning chetki chap qatorida harakatlanishi yo‘nalishli transport vositalari to‘xtaydigan bekatlardan yoki piyodalar o‘tish joylaridan yurish, tashqi yoritish asboblaridan foydalanish qoidalarini buzishi, xuddi shuningdek yo‘lovchiga yoki piyodalarga loyqa sachratishi
bazaviy hisoblash miqdorining bir baravari miqdorida jarima solishga sabab bo‘ladi.
